(( ماشفت لي ياطير زين الوصايف ))

بديت في راس الطويل المهايف
الصبح بدري وشارق الشمس مابان

واخذت في راسه اهل الحسايف
كني غريب لشوف الاحباب شفقان

عايف لذيذ النوم مبطي وخايف
ماتنتبه للشوق ياخدر الاعيان

ياطير ياللي سابح بالهفايف
ياللي تحوم بعالي الجو طربان

ماشفت لي ياطير زين الوصايف
اللي جديله فوق الامتان حيران

ام الخدود الزاهية والشفايف
حمر عليها وصف خاتم سليمان

سيد البنات المترفات العفايف
مثل القمر لكنها بصورة إنسان

الله فرقها بين كل الطوايف
ويالايمي جعلك على اللوم تنهان

عقب اللقاء وين انت يابو الرهايف
شهرين والغيبه هماليلها احزان

أخذت قلبي بين حدب النحايف
ابغى حياتي وانت مانته بخوان

عطني علومك كان ناوي نكايف
والا تراني بأطلبك سر واعلان